Kufizimi i përdorimit të automjeteve, eksperti: Të riformatohet infrastruktura rrugore

Teksa qeveria qendrore ka hedhur për konsultim një projektligj për kufizimin e përdorimit të automjeteve nga qytetarët, ekspertët e sigurisë rrugore propozojnë riformatim të shërbimit të transportit urban si dhe infrastrukturës rrugore.

“Shërbim troli nuk kemi, as metro, domethënë shërbimi udhëtar në kompleksitetin e saj lë shumë për të dëshiruar. Mendoj që nuk mund të zbatohet, sepse i bie që një ditë të shkosh në punë dhe një ditë të jesh pushim. Unë do rekomandoja përmirësimin e shërbimit urban, vendosja e tramvajit apo edhe trenit veri–jug dhe lindje–perëndim në qytetin e Tiranës,” thotë eksperti rrugor Arben Luzi.

Në intervistën për Radio Televizionin Shqiptar, ai shton se zbatimi i këtij projektligji, ashtu siç është hartuar në këtë fazë, është vështirësisht i zbatueshëm, pasi pesha do të bie mbi përdoruesit e rrugës.

“Mirë në ditën tek që i takon të qarkullojë, po në ditën çift do t’i pritet gjobë? Ai nuk pengon njeri. Do rrisim numrin e gjobave, se nuk bëjmë zgjidhje? Nuk ka shërbim urban, trol, tramvaj, që t’i shërbejë personit për të vajtur e për të ardhur nga puna,” tregon z. Luzi.

Projektligji që po diskutohet vjen në një kohë kur numri i automjeteve sa vjen e rritet, ndërsa autoritetet po përpiqen të gjejnë alternativa për të minimizuar vështirësinë në qarkullim.

Një mundësi është edhe ajo e lëvizjes së automjeteve me ditë të caktuara, sipas targave, nëse numri i tyre është tek apo çift.

Plani kombëtar përcakton masat që pritet të merren edhe sa i përket promovimit të transportit publik, caktimit të taksave të qarkullimit, si dhe përdorimit të teknologjive të reja për të ndihmuar menaxhimin efikas të sistemeve të transportit.