“Kujdes si flisni, shqiptarët dinë italisht”, udhëzimi për oficerët italianë që do mbikëqyrin kampin në Gjadër

Ndërsa na ndan edhe pak kohë nga hapja e kampit në Gjadër, agjentët italianë  të cilët pritet të mbërrijnë në Shqipëri më 20 gusht për mbikëqyrjen e qendrave të emigrantëve, duket se janë trajnuar mbi shumëçka, duke përfshirë këtu edhe mënyrën e sjelljes me gratë shqiptare, porositë në bare e restorante, qasjen ndaj qytetarëve, dhe moderimin e të folurit në publik.

Guida me 14 pikat e përcaktuara për 45 oficerët e parë të policisë italiane që do mbërrijnë në Shqipëri, është publikuar këtë të martë (6 gusht) nga La Repubblica.

Oficerët italianë janë këshilluar që të kenë kujdes kur flasin, pasi sikurse iu është komunikuar gjatë trajnimit, pothuajse të gjithë shqiptarët kuptojnë gjuhën italiane.

Një tjetër pikë e cila nënvizohet në dokumentin e publikuar nga media italiane, është udhëzimi mbi mënyrën e qasjes nga grave shqiptare. Oficerët italianë janë udhëzuar të mos komunikojnë me gratë shqiptare, pasi mund të hasen në konflikte me bashkëshortët e tyre.

“Si fillim, “shmangni qasjen ndaj grave shqiptare. Një burrë që e sheh gruan e tij të kuruar nga një burrë tjetër, mund të reagojë keq”. Dhe ndërsa jemi në të, duke qenë se këta janë “një popull modest, lakuriqësia apo veshja e papërshtatshme në publik nuk është e mirëseardhur””, nënvizohet në dokument.

“Konsumimi i kafe nuk është në banak por vetëm ulur”, “Në restorante, rrini në menu, kërkesat për ndryshime nuk janë të mirëpritura”. Dhe, në fund, rekomandimi i rekomandimeve: “Kini kujdes se si flisni… pothuajse të gjithë shqiptarët dinë italisht”.

Sekretari i përgjithshëm i Policisë së burgjeve të UIlpa, Gennarino De Fazio ka shprehur kritika mbi mënyrën e përzgjedhjes së 45 oficerëve të parë që do të mbërrijnë në Shqipëri për mbikëqyrjen e kampit në Gjadër, ashtu edhe për gjendjen e jashtëzakonshme në burgjet italiane.

45 oficerë italianë, mes të cilëve edhe një menaxher, do të mbikëqyrin një maksimum prej 20 emigrantësh që do mbërrijnë në Shqipëri.

Ndërsa në Itali, thekson artikulli, 7-8 agjentë mbikëqyrin 400-500 të arrestuar.