Kukësi, fitore karakteri ndaj Vllaznisë

Kukësi vazhdon ringjalljen nën drejtimin e trajnerit Stavri Nica dhe të premten ka korrur një fitore karakteri ndaj Vllaznisë, teksa arriti të ngadhënjente edhe pse e luajti pjesën e dytë me 10 lojtarë. Në fakt, takimi që ngriti siparin e javës së 10-të, që është edhe java e parë e fazës së dytë të Kategorisë Superiore, i luajtur në Stadiumin “Kukës Arena”, ka parë një lojë mesatare në 45 minutat e fillimit, me të dyja skuadrat që kanë ndërtuar pak raste për t’u shënuar.

Skuadra vendase do të detyrohet ta mbyllë pjesën e parë me 10 lojtarë, pasi ndërhyrja e Reçit në dëm të Çeshmedijevit në minutën e parafundit ndëshkohet fillimisht me karton të verdhë, por që shndërrohet në të kuq pas konsultimit të kryesorit me Sistemin e Ndihmësgjyqtarit të Videos (VAR). Edhe pjesa e dytë ka patur të njëjtën tablo, edhe pse Vllaznia është munduar, por pa arritur ta shfrytëzojë siç duhet epërsinë numerike në fushën e blertë përballë një Kukësi që mbrohet me kujdes.

Madje skuadra vendase do të gjejë rrugën e rrjetës me anë të Rashitit, që ishte futur në fillimin e pjesës së dytë në vend të La Torres, dhe realizon në minutën e 84-t golin e vetëm. duke i dhënë fitoren ekipit të tij. Pas kësaj fitoreje, e 4-ta për të në këto 10 javë të para, Kukësi ngjitet në kuotën e 13 pikëve, ndërsa Vllaznia mbetet një pikë më prapa.