Kumbulla e zezë e Veriut, ndër frutat më të kërkuara nga tregu europianProdukt…

Kumbulla e zezë e Veriut, ndër frutat më të kërkuara nga tregu europian

Produkte tipike autoktone shqiptare vijojnë t’i shtohen gamës së eksporteve bujqësore, duke rritur vlerën në ekonominë e vendit dhe zgjeruar hartën e gjeografisë të vendeve ku tregtohen.

Krahas disa prej bimëve mjekësore, boronicës, gështenjës së Tropojës, vajit të ullirit, mollës së Korçës etj., është dhe kumbulla e zezë e Veriut, që konsiderohet si një ndër thesaret e Shqipërisë, për vetë kërkesën e lartë që ka tregu europian për këtë frut.

Ministria e Bujqësisë dhe Zhvillimit Rural bën të ditur se eksportet e kumbullës së zezë shënojnë shifrat e disa dhjetëra tonëve, me destinacion kryesor vendet nordike, që përbëjnë edhe tregje me fuqi të lartë blerëse.

“Ne po mbështesim fermerët përmes Skemës Kombëtare, Programit IPARD dhe projekteve të ndryshme me donatorët ndërkombëtar për sipërmarrje në bujqësi dhe uljen e kostove të prodhimit, ku pa dyshim, bujqësia organike dhe produktet që avantazhojnë Shqipërinë në eksporte, zënë një vëmendje të shtuar në politikat mbështetëse të MBZHR-së”, thekson MBZHR.

Kumbulla e zezë rritet kryesisht në zonën verore të vendit dhe njihet për cilësinë dhe shijen e mirë. Falë mbështetjes, sipërfaqet e mbjella me kumbullën e zezë po zgjerohen gjithnjë e më shumë. Kjo si rrjedhojë e kërkesës së lartë nga tregjet europiane.

Kultivimi i kumbulles së zezë është burimi kryesor i të ardhurave për më shumë se 140 prodhues të vegjël dhe të mesëm dhe 600 deri në 1000 punëtorë të përkohshëm, që angazhohen gjatë stinës së vjeljes së kumbullave.

Burimi