Kupa e Shqipërisë në volejboll / Fitore për Vllazninë e femrave, humbin meshkujt

Një fitore dhe një humbje kanë regjistruar dy ekipet e Vllaznisë në ndeshjet e Kupës së Shqipërisë në Volejboll. Që të dy ekipet kuqeblu, ndeshjet e javës së dytë i zhvilluan në transfertë. Vllaznia e femrave, e drejtuar nga trajnerja Nora Deda,  ishte mysafire në Durrës ku doli fituese me rezultatin 1 me 3, ndërkohë që Vllaznia e meshkujve e drejtuar nga trajneri Artan Kalaja luajti në Shijak, ku u mund me rezultatin 3 me 2. Në përballjen e femrave,  ndeshje e luajtur në pallatin e sportit “Ramazan Njala”, volejbollistet durrsake fituan setin e parë me rezultatin 25 me 19 duke dhënë sinjale se mund ta fitonin këtë ndeshje. Por, në tre setet e tjerë, volejbollistet shkodrane reaguan në mënyrën më të mirë duke i bërë një kthesë të fuqishme lojës. Edhe pse vijojnë të luajnë pa kapitenen Zhivani që konsiderohet ndër pikat më të forta të skuadrës, rolin e së cilës tashmë e ka marrë në fushën e lojës Sarah Beci, volejbollistet kuqeblu kanë arritur të fitojnë me radhë tre setet e tjerë në vazhdim duke dalë fitues të të gjithë ndeshjes me rezultatin e përgjithshëm, 1 me 3. Megjithatë, fitorja nuk ka qënë e lehtë për tu arritur, sepse për përpos fitores së setit të dytë dhe të katërt, përkatësëisht me shifrat, 13 me 25 dhe 22 me 25, seti i tretë ka qënë shumë i dyluftuar, gjë që dëshmojnë pikët shtesë, 30 me 32 në favor të Vllaznisë. Ndërkohë, fitorja e femrave ndaj Teutës nuk është shoqëruar me të njëjtin sukses për ekipin e meshkujve, i cili në të njëjtën ditë ishte mysafir në Shijak  ku u mund me rezultatin 3 me 2. Për t’u theksuar është se Vllaznia e nisi më mirë teksa fitoi setin e parë të kësaj ndeshje me rezultatin 21 me 25. Shijakasit fitojnë setin e dytë me rezultatin 25-16 duke barazuar shifrat e seteve në 1 me 1. Kuqerblutë e drejtuar nga trajneri Kalaja rimarrin kryesimin e seteve në 1 me 2 duke dalë fitimtarë në setin e tretë 22 me 25. Por, vetëm kaq, sepse Erzeni, jo vetëm që fiton setin e katërt 25 me 21, por duke fituar edhe setin final, 15 me 11, fiton të gjithë ndeshjen me rezultatin e përgjithshëm të seteve, 3 me 2.