Kush po vendos tritol në Shkodër ? Nga fillimi i vitit janë regjistruar 6 ngjarje, një autor i shpallur në kërkim

Ngjarjet e shpërthimeve me tritol në Shkodër kanë rikthyer sërish në vëmendje situatën e rendit dhe sigurisë në qytet. Sipas të dhënave zyrtare nga Drejtoria Vendore e Policisë së Shkodrës, nga fillimi i vitit 2024 janë shënuar 6 shpërthime me lëndë plasëse.Tritoli në derën e banesës së gjyqtarit Tonin Sterkaj në Prill të vitit 2024 do të niste vazhdën e ngjarjeve të tjera me tritol. Vetë i shënjestruari nuk i ka mohuar për asnjë moment se kërcënimi të mos i vinte për shkak të detyrës, pasi ai në dëshminë e tij, po ashtu siç edhe gruaja e tij, i kanë qëndruar versionit se nuk kanë asnjë problem tjetër në jetën e tyre, ndaj edhe të gjitha hetimet dhe versionet janë ngritur në pistën e ushtrimit të detyrës nga ana e gjyqtarit Sterkaj. Mëngjesin e 24 Majit një sasi tritoli u vendos në ambientet e jashtme të një hoteli në Razëm, por pronari i lokalit reagoi duke thënë se shpërthimi nuk kishte lidhje me pronën e tij dhe me familjen e tij, sepse sipas tij lënda plasëse ishte vendosur në parkingun e një lokali.19 Qershor 2024 i vendoset tritol në automjetin e parkuar në oborrin e banesës efektivit të policisë së Shkodrës, Kastriot Selimaj. Nga hetimet u dyshua se kemi të bëjmë me një mesazh dhe sulm për shkak të detyrës së policit. Ishte ora 3 e mëngjesit të datës 3 korrik, kur dy persona ende të paidentifikuar vendosen një sasi tritoli në derën e shtëpisë së policit Vilson Zhuri, në lagjen “Tepe”, në periferi të Shkodrës. Policia dyshon deri tani se kjo ngjarje mund të ketë ardhur si shkak i detyrës. Pa u bërë  muaji nga shpërthimi me tritol në banesën e policir Zhuri, në datën 28 Korrik të këtij viti, një tjetër sasi tritoli shpërtheu në lagjen “Mark Lula” , në derën e shtëpisë të shtetasit Robert Geraj. Policia identifikoi dhe shpalli në kërkim si autor të dyshuar shtetasin Luigj Martini. Shpërthimet me tritol u pasuan edhe me ngjaren e fundit të kësaj të marte, kur një sasi lënde shpërthyese iu vendos një lokali në Velipojë në pronësi të shtetasit Andis Danaj, i njohur edhe si Paris Preka. Për të gjashte ngjarjet e shpërthimeve me tritol,   policia e Shkodrës ka arritur që të zbardhë njërën prej tyre duke shpallur në kërkim një shtetas.