Latin Grammy, Karol G dhe Shakira “rrëmbejnë” çmimet kryesore

Karol G dhe Shakira kryesuan listën e çmimeve në Grammy-t Latin 2023.

Karol rrëmbeu çmimin më të madh, ku albumi i saj “Mañana Será Bonito” fitoi albumin e vitit. Fitorja rezultoi emocionuese për këngëtaren e hitit “Provenza”, e cila nuk i mbajti lotët teksa mbante fjalën e saj.

“Është një nder ta marr këtë para kaq shumë njerëzve në muzikë, të cilët i admiroj dhe jam rritur duke i dëgjuar. Ky album ndryshoi jetën time dhe është e pabesueshme për mua që ka ndryshuar jetën e kaq shumë njerëzve”, tha ajo.

Ndërkohë, Shakira, bashkëpunëtorja e Karol në këngën “TQG” udhëhoqi në kategorinë e këngës së vitit dhe këngës më të mirë pop për bashkëpunimin e saj me Bizarrap “Bzrp Music Sessions, Vol. 53”. Këngëtarja e “Monotonía”, e cila ka publikuar një sërë këngësh pas ndarjes së saj nga ish i dashuri Gerard Piqué, ia kushtoi fitoren djemve Milan dhe Sasha.

“Unë u premtova atyre se do të jem e lumtur, se ata do të kenë një nënë që qesh me gjithë të qeshurën që ka, sepse ata e meritojnë atë. Që tani e tutje, unë jam duke menduar për gjithçka që do të vijë: këngët që do të shkruaj, turneun që do të bëj. Sepse, siç thotë një miku im, ‘Nuk ka asgjë në të kaluarën. Vetëm e ardhmja mbahet mend“, tha Shakira në spanjisht.