Libri i Britni Spirsit, shiten 1,1 mln kopje: Kujtimet e yllit të popit në “Jetë shqiptare”

Ajo ka qenë artistja më e njohur e fundviteve ’90 dhe ndër më të përfolurat në medie. Britni Spirs (o. Britney Spears) i ka treguar të gjitha në librin e saj “Gruaja brenda meje” (The Woman in Me).

Autobiografia e këngëtares, e cila ka dalë për lexuesit më 24 tetor, është shitur në mbi 1,1 milionë kopje deri tani.

Në të tregohen historitë personale dhe të dhimbshme nga jeta e 41-vjeçares.

Një ndër momentet më të forta është rrëfimi i tentativës për vetëvrasje.

“Ajo ka tentuar disa herë të bëjë vetëvrasje, sidomos në periudhën që ishte duke përjetuar të gjitha gjyqet majtas-djathtas, më së shumti virtuale, pasi nuk kishte mundësi të shkonte në dëgjesa për të thënë atë që donte. Përpos asaj ajo tregon edhe për familjen e saj, për të atin, i cili e ka bullizuar që në momentin kur ajo bëri gjestin jo aq etik, por traumatik, të rruajtjes së kokës dhe më pas të daljes në publik,” tha gazetari Granit Perzhita, njëherësh student i jurisprudencës në SHBA.

Libri “Gruaja brenda meje” përshkruan karrierën e yllit të muzikës pop dhe sprovat e shumta të jetës së saj personale.

Spirsi shtjellon marrëdhëniet e saj romantike, martesat e dështuara, betejat e shëndetit mendor dhe atë për “kujdestarinë” e babait të saj.