Liga e kampioneve, Vllaznia mund Hajvalinë/ Të shtunën, finalja e grupit 7-të, Vllaznia-Valur(Islandë)

Janë luajtur ditën e djeshme në stadiumin “Loro Boriçi” të Shkodrës, dy ndeshjet e para eleminatore të raundit të parë të vlefshme për Ligën e Kampioneve të Europës. Në sfidën e parë të orës 12:00, kampionia e Islandës Valur Rejkjavik mundi kampionen e Turqisë Fomget Gençlik 2-1 duke siguruar e para bileten finaliste. Ndërkohë, një gjë të tillë e arriti edhe Vllaznia, e cila në ndeshjen e dytë të luajtur mbrëmë në stadiumin “Loro Boriçi” mundi me rezultatin 4-2 kampionen e Kosovës Hajvalia. Një ndeshje kjo e cila u transmetua ekskluzivisht nga RTSH Shkodra dhe RTSH Sport, drejtpërdrejtë nga stadiumi “Loro Boriçi”. Futbollistët kuqeblu me trajnerin Haris Lika në pankinë, debutimi i tij i parë si trajner i Vllaznisë, e mbyllën pjesën e parë me avantazhin 2-1 falë golave të shënuar nga Gresa Berisha dhe Luçie Gjini, ndërkohë që për skuadrën kosovare shënoi Lumbardha Misini. Në pjesën e dytë vijnë edhe dy gola të tjerë për Vllazninë me autore Maria Bashka dhe Gresa Berisha, si një tjetër nga Hajvalia me autore Bardha Mahmuti duke bërë që e gjithë ndeshja të mbyllet me fitoren e merituar të Vllaznisë 4-2. Pas ndeshjes, nga kampi kuqeblu janë prononcuar trajneri Haris Lika dhe presidenti Lazër Matija, ndërkohë që nga klubi kosovar Hajvalia ka folur trajneri, Musa Selimi.Ndeshjet e grupit të 7-të eleminator që po luhen në Shkodër rikthehen ditën e shtunë me dy ndeshje të tjera. Fillimisht, në orën 12:00 do të luhet ndeshja Hajvalia-Fomget e vlefshme për vendin e tretë dhe të katërt, ndërkohë që në orën 18:00 është dueli final, Vllaznia-Valur(Islandë) ku skuadra fituese vazhdon më tej në raundin tjetër mes 32 skuadrave më të mira Europiane.