Lobimi rus, Kulluri: Basha i dërgoi BBC sqarim. Çështja është mbyllur nga Prokuroria

“Basha- BBC rikthen lobimin rus” ka qenë në qendër të pjesës së parë të emisionit ‘3D’ në RTSH të drejtuar nga Alban Dudushi.

Sekretari për marrëdhëniet me publikun në Partinë Demokratike, Edvin Kulluri, i pranishëm në studio,  deklaroi se që në vitin 2018 ka qenë i vetmi anëtar i Këshillit Kombëtar që ka kërkuar transparencë për këtë çështje.

“Kam kërkuar këtë që ka ndodhur sot. Po ta shikoni me vëmendje shkrimin e botuar në BBC, nuk ka asgjë të re në substancë. Besoj se është shumë korrekte që z. Basha i është drejtuar dhe i ka dhënë një përgjigje BBC, pra është një akt ballë për ballë kundrejt shkrimit”, tha Kulluri.

Sipas tij, si në atë kohë ashtu edhe sot nuk kam bërë asnjëherë as prokurorin dhe as gjykatësin, as për këtë çështje, as për McGonigal, as për çështjen e Metës.

“Këto janë debate që kanë lindur jashtë Shqipërisë dhe nuk mund të flasim me kompetencë për asnjë nga këto çështje.  Së dyti nuk ka prova të qarta për asgjë, pra janë çështje ambigue, nuk kemi para fakteve korrekte sikurse janë inceneratorët”, tha Kulluri.