“Lojëra Popullore Fest” tradita vazhdon/ Qëllimi i eventit mbetet ruajtja dhe promovimi i trashëgimisë kulturore

Edhe për këtë vit tradita e zhvillimit të “Lojra Popullore Fest” nuk është ndalur teksa ato nisën me ecjen demonstrative nga Truma e Dugajve deri tek sheshi përpara bashkisë, i cili u “pushtua” nga këngë e valle që në thelb kanë evidentimin e trashëgimisë kulturore. Trupat rinore nga Kosova, Maqedonia e Veriut, Bullgaria, Shkodra, Malësia e Madhe dhe Vau i Dejës i dhanë jehonë ndërkombëtare organizimit të këtij eventi.

Kastriot Faci, në rolin e organizatorit shpreh ndikimin që ky aktivitet ka në aspektin turistik.E veçanta e organizimit të këtij edicioni qëndron tek ndërkombëtarizimi i aktivitetit me zgjerimin e trupave pjesëmarrëse.

Edicioni i 16-të i “Lojra Popullore Fest” u organizua nga The Door Albania me

mbështetjen financiare të Agjencisë Kombëtare e Rinisë dhe Ministrit të Shtetit për Rininë dhe Fëmijët. Në përfundim të aktivitetit, juria vlerësoi grupin nga Bullgaria si fitues të çmimit të parë.