“Lojëra Popullore” ul siparin – Këngët dhe vallet tradicionale dhuruan atmosferë për të pranishmit në shesh

Me pjesëmarrjen e 10 trupave nga Shqipëria, Kosova, Mali i Zi dhe Maqedonia e Veriut, Shkodra priti edicionin e 17 të “Lojëra Popullore”.

Këngët dhe vallet, lojërat dhe kostumet tradicionale përcollën tek qytetarët në sheshin para bashkisë një atmosferë të veçantë.

Përfshirja sociale, pasurimi i jetës kulturore, promovimi i vlerave të trashëgimisë shpirtërore si dhe rëndësia e angazhimit të rinisë janë disa nga mesazhet që shpalosi organizimi i këtij aktiviteti nga OJF “The Door” me mbështetjen financiare të Bashkisë Shkodër.

Dëshira e organizatorit Faci është që ky aktivitet të ketë një mbështetje më të gjerë, duke u përfshirë në kalendarin e aktiviteteve kulturore në rang kombëtar.

Në përfundim të festivalit, me vendin e parë u vlerësua grupi “Jahi Hasani” nga Gostivari i Maqedonisë së Veriut. Me vendin e dytë u vlerësua grupi “Minatori i ri”, Kishnicë (Kosovë) dhe me vendin e tretë Ansambli folklorik “Ana Morava”, nga Vitia e Kosovës.