“Lonely Planet”, artikull për Velipojën / Prestigjozja botërore e rendit plazhin ranor mes më të mirëve në vend
Prestigjozja botërore “Lonely Planet” i ka kushtuar një artikull të gjerë bukurive të bregdetit shqiptar nga veriu në jug.
Plazhet shqiptare kanë qenë një trend kohët e fundit në TikTok.
Ky vend i vogël ballkanik ofron një formacion të jashtëzakonshëm të tyre.
Të zbukuruar nga ujërat e kristalta dhe të thellë blu, plazhet në Shqipëri rivalizojnë çdo vend të Evropës.
Të rrethuar nga detet Jon dhe Adriatik, këto plazhe variojnë nga vendpushimet e populluara dhe argëtuese deri te limanet sekrete idilike të arritshme vetëm me varkë”, shkruhet në artikullin e botuar në revistën globale të udhëtimit “Lonely Planet”.
Në renditjen e 8 plazheve më të mira të Shqipërisë zë vend edhe plazhi më i madh ranor i vendit, Velipoja. Artikulli i bën një përshkrim po ashtu edhe kryeqendrës së veriut, Shkodrës.
“Qyteti i mrekullueshëm, Shkodra, është porta e ecjes malore në Bjeshkët e Nemuna të quajtura edhe Alpet Shqiptare. Qyteti është vetëm 30 kilometra larg nga plazhi i gjatë dhe me rërë të imët të Velipojës, i cili ofron një atmosferë rinore që ngjason me atë të Rivierës Franceze falë bareve të shumta të tij buzë detit”, shkruan revista botërore ku mes rreshtave sugjeron vizitorët e natyrës të bëjnë ecjen në majat e shtegut të Ballkanit përmes Thethit dhe Valbonës. “Shumica e akomodimeve në Shkodër organizojnë udhëtime shumëditore”, vijon më tej artikulli.
Bukuritë e vendit me peizazhe mbresëlënëse kanë qenë vitet e fundit në fokus të disa mediave prestigjoze botërore duke ndikuar pozitivisht në promovimin e vendit në sytë e botës dhe për rrjedhojë edhe në rritjen e numrit të vizitorëve.
