“Lotët nëpër faqe”, Mihrije Braha kujton detaje nga pjesëmarrja e parë në Festivalin e Këngës në RTSH

Këngëtarja e mirënjohur Mihrije Braha ka kujtuar në emisionin “Mirëmëngjesi Shqipëri” vitin 1992.

Braha ka deklaruar se për herë të parë ka pasur fatin të konkurrojë në Festivalin e Këngës në RTSH në vitin ’92, me “Lotët nëpër faqe’, e cila sikurse shprehet këngëtarja, u kthye më pas në megahit që i rezistoi çdo kohe.

“Mendoj që çdo artist e dëshiron atë skenë madhështore të Festivalit të madh të Këngës në RTSH. Unë për herë të parë kam pasur fatin e rrallë të marrë pjesë në 1992 dhe fatmirësisht pastaj u pozicionova në vendin e tretë dhe kënga ime “Lotët nëpër faqe” është një prej këngëve më të bukura, si megahit që i reziston kohëve.

Kujtime më të bukura se ajo periudhë kohore, zor se i përjeton dikush”, u shpreh këngëtarja e cila bëri me dije se këngëtarët nga Kosova arritën të shkonin të gjithë në finale në festivalin e ’92-shit.

“Jam e lumtur që kam qenë në mesin e katër këngëtarëve përfaqësues nga Kosova dhe për herë të parë Festivali i Këngës në RTSH i theu tabutë dhe doli jashtë kufirit.

Isha unë, Sabri Fejzullahu, Armend Rexheagiqi e Aida Baraku dhe Adelina Ismajli.

Ka qenë ëndrra jonë me marrë pjesë dhe për të kapur mikrofonin e bukur të skenës dhe të katërt ne shkuam në finale dhe ky ishte suksesi i radhës”, tha Braha.