Lufta Hamas-Izrael/ Blinken udhëton sot drejt Tel Avivit, thirrje për armëpushim

Sekretari amerikan i Shtetit, Entony Blinken mbërrin këtë të premte (3 nëntor) në Tel Aviv ku pritet që t’i kërkojë qeverisë izraelite që të pajtohet me ndalimin e luftimeve në Gaza.

Zëdhënësi i Sigurisë Kombëtare të Shtëpisë së Bardhë, Xhon (John) Kirby, tha se Shtetet e Bashkuara nuk po mbrojnë një armëpushim të përgjithshëm, por një pauzë “të përkohshme, të lokalizuar”.

Teksa po largohej nga Uashingtoni, Blinken deklaroi se në vizitën e tij në Tel Aviv, do të diskutojë hapat konkretë për të minimizuar dëmtimin e civilëve në Gaza gjatë vizitës së tij në Izrael.

Që kur militantët e Hamasit sulmuan Izraelin më 7 tetor duke vrarë 1,400 izraelitë, të paktën 9,061 palestinezë janë vrarë në luftë, kryesisht gra dhe të mitur, dhe më shumë se 32,000 njerëz janë plagosur. Lajmi u bë me dije nga Ministria e Shëndetësisë në Gaza.

Më shumë se 3,700 fëmijë palestinezë janë vrarë në 25 ditë luftimesh, më shumë se gjashtëfishi i 560 fëmijëve që OKB-ja kishte raportuar të vrarë në 19 muajt e luftës në Ukrainë deri më 8 tetor.

Bombardimet kanë dëbuar më shumë se gjysmën e 2.3 milionë banorëve të territorit nga shtëpitë e tyre. Ushqimi, uji dhe karburantet po mbarojnë nën rrethimin e Izraelit dhe spitalet e mbingarkuar paralajmërojnë se janë në prag të kolapsit.