Lufta Izrael-Hamas/ SHBA vendos veton ndaj rezolutës së OKB-së që bën thirrje për armëpushim në Gaza

Shtetet e Bashkuara vendosën veton ndaj një rezolute të Këshillit të Sigurimit të OKB-së, që bën thirrje për një armëpushim të menjëhershëm në Gaza. Votimi erdhi pasi shefi i OKB-së Antonio Guterres paralajmëroi për një rrezik të lartë të kolapsit të sistemit të mbështetjes humanitare që mund të çojë në pasoja të tmerrshme në enklavën ku po zhvillohen luftimet.

Gjatë debatit, ambasadori palestinez përmendi mijëra të vrarë e të plagosur në sulmin e Izraelit në Gaza, duke thënë se “mjaft është mjaft”, ndërsa i dërguari i Izraelit tha se një armëpushim vetëm do të zgjaste luftën dhe se e vetmja mundësi për paqen ishte eliminimi i Hamasit.

Ushtria izraelite tha se kreu sulme në rreth 450 objektiva gjatë ditës së kaluar, numri më i lartë i raportuar që nga përfundimi i armëpushimit me Hamasin një javë më parë. Ministri i Mbrojtjes Yoav Gallant pohoi të premten se ai sheh shenja që Hamasi është në një pikë kthese në Gaza./ CNN