Macron: Humbja e Rusisë në luftën në Ukrainë është jetike për sigurinë në Evropë
Presidenti francez Emmanuel Macron e ka konsideruar thelbësore për sigurinë e Evropës humbjen e Rusinë në luftën në Ukrainë, mes lutjeve urgjente për më shumë armë nga Kievi.
Macron tha se liderët evropianë kishin rënë dakord të krijonin një koalicion për t’i dhënë Ukrainës raketa dhe bomba me rreze të mesme dhe të gjatë veprimi.
“Ne jemi të bindur se disfata e Rusisë është e domosdoshme për sigurinë dhe stabilitetin në Evropë. Ne nuk jemi në luftë me popullin rus. Ne thjesht nuk duam t’i lëmë ata të fitojnë“, tha Macron.
Ai shtoi se nuk kishte “konsensus” për dërgimin e trupave perëndimore në Ukrainë, por “asgjë nuk duhet të përjashtohet”.
Kievi është i varur në mënyrë kritike nga furnizimet moderne të armatimit nga aleatët e tij perëndimorë, veçanërisht nga SHBA, për të qenë në gjendje të vazhdojë të luftojë Rusinë.
Por miratimi i një pakete ndihme shumë të nevojshme prej 95 miliardë dollarësh, duke përfshirë 61 miliardë dollarë për Ukrainën, përballet me një betejë të vështirë në Dhomën e Përfaqësuesve.
Lufta në Ukrainë e nisur nga presidenti rus Vladimir Putin është tani në vitin e tretë, pa asnjë shenjë se lufta më e madhe në Evropë që nga Lufta e Dytë Botërore mund të përfundojë së shpejti.
