Mala dhe Brahimi, firmosin për Vllazninë, portieri Mëhidri e mbyll me kuqeblutë. Stafi i beson të riut Juka
Vllaznia vazhdon të plotësojë radhët e saj me firmosjen e kontratave zyrtare, ku dy të radhës janë Esat Mala dhe Amir Brahimi. Një nga futbollistët e kontigjentit kuqeblu të sezonit të kaluar, Esat Mala, kishte mbetur disi pezull sa i përket vazhdimësisë me Klubin e Futbollit Vllaznia. Madje, kishte zëra të tillë që mesfushori nga Prizreni edhe mund të largohej tërësisht nga skuadra kuqeblu. Por, një gjë e tillë ka marrë kur mes tij dhe KF u nwnshkrua rinovimi i kontratës edhe për një sezon tjetër. Ndërkohë, Amir Brahimi, futbollist i rritur në Akademinë e Futbollit Vllaznia që nga mosha 14 vjeç me trajner Brikeno Bizin, duke vazhduar me ekipe dhe trajnerë të tjerë moshash, u bë pjesë e ekipit të parë të Vllaznisë, madje duke marrë minuta në fushën e lojës. Ndërkohë, mesditen e së mërkurës ishte moment i shumëpritur kur ai arriti të firmosë një kontratë zyrtare me KF Vllaznia, e para profesioniste në karrieren e tij sportive. Ndaj, për këtë, Amir Brahimi e shpreh qartë edhe në videoklipin e realizuar nga sektori i marketingut në mjediset e stadiumit “Reshit Rusi” si dhe “Loro Boriçi”.
Por, krahas afrimeve ka edhe largime nga radhët e Vllaznisë, siç është rasti i portierit Jurgen Mëhidri, me të cilin klubi ka shkëputur bashkëpunimin, duke qënë se për këtë sezon sportiv i ka besuar të riut Jukaj pozicionin e portierit të tyre.
