Mali i Zi me qeveri të re, deputeti i koalicionit “Aleanca Shqiptare”: Integrimi në BE, rruga e padiskutueshme

Qeveria e re e kryeministrit Milojko Spajiq do të udhëheqë Malin e Zi, ndërsa zgjedhja e tij është kundërshtuar nga SHBA dhe BE, duke e cilësuar si kundërshtar të orientimit pro-perëndimor të vendit.

Në një lidhje me Skype për RTSH24, deputeti i Koalicionit Aleanca Shqiptare në Malin e Zi, Fatmir Gjeka tha se integrimi në BE është “rruga e padiskutueshme” e Malit të Zi. Sipas tij, nuk ekziston rreziku që vendi të largohet nga kjo axhendë. Spajiq theksoi se axhenda e qeverisë së re është në përputhje me politikën evropiane dhe amerikane.

“Duhet kujdes që të mos ketë pengesë në procesin për integrimin në BE. Për ndryshimin e kursit të Malit të Zi nuk është çështje që mund të diskutohet apo të na brengosë. Është çështje që mund të ngadalësojë pak reformat. Në Mal të Zi 75% e subjekteve në Parlament dhe përkrahja që i japin qytetarët është për Malin e Zi në BE, në NATO.

Nuk është diçka që mund të rrezikojë as politikën e brendshme të Malit të Zi as politikën e jashtme. Është e padiskutueshme që rruga drejt BE është e vetmja rrugë për Malin e Zi. Na mbetet të gjejmë një stabilitet politik dhe të vazhdojmë reformat”, u shpreh ai.

Parlamenti i Malit të Zi, zgjodhi mëngjesin e së martës (31 tetor) qeverinë e re, pas një seance që zgjati gjithë natën. Qeveria e re e kryeministrit Milojko Spajiq u mbështet nga votat e 46 deputetëve të shumicës së re parlamentare, ndërsa kundër votuan 19 deputetë të opozitës. Pesë deputetë munguan dhe një abstenoi nga votimi.

Qeveria mori mbështetjen e partisë “Evropa Tani” e kryeministrit Spajiq, nga koalicioni “Për ardhmërinë e Malit të Zi”, që dikur njihej si Fronti Demokratik pro-serb dhe pro-rus, deputetët e partisë “Demokratët”, “Partia Popullore Socialiste” dhe dy koalicionet shqiptare,” Alternativa Shqiptare” dhe “Forumi Shqiptar”.