Malltezi me masë më të butë sigurie, Berisha: Asnjë risi, sistemi i drejtësisë i kontrolluar nga Rama

Gjykata e Posaçme (GJKKO) vendosi sot (21 nëntor) masë sigurie më të butë për Jamarbër Malttezin, “arrest shtëpie”, por për ish-kryeministrin Sali Berisha ky vendim nuk ka asnjë risi. Në një konferencë për shtyp, Berisha akuzoi se sistemi i drejtësisë, sipas tij, është i kapur nga kryeministri Edi Rama.

“Së pari, më duhet të them se nuk ka asnjë risi në vendimet, të cilat dëshmojnë kontrollin e plotë dhe total të sistemit të drejtësisë, shndërrimin e saj në degë ekzekutivi nga narkodiktatura dhe Edi Rama”, u shpreh ai.

Berisha akuzoi prokuroren Enkeleda Millonai se ka deklaruar në seancë se “korrupsioni konsumohet edhe duke zbatuar ligjin”.

“Unë dua t’u informoj ju se dje në sallën e gjyqit, famozja për lidhjet obskure me Taulant Ballën, ka deklaruar sa vijon: Sipas saj, korrupsioni konsumohet edhe duke zbatuar ligjin. Nuk ka standard më amoral sesa ky. Dhe është e regjistruar kjo. Kur një njeri i ligjit, deklaron se mosshkelja e ligjit, pra korrupsioni konsumohet duke zbatuar ligjin, ajo fshin çdo kufi midis moralit dhe amoralitetit, midis ndershmërisë dhe vjedhjes, midis zyrtares dhe banditizmit.

Ajo bëhet në sallën e gjyqit ashtu siç është. Njeri që nuk njeh normë, ligj apo moral, përveç lidhjeve të saj obskure me një kriminel me kravatë, siç është Taulant Balla. Një deklaratë të tillë nuk e gjeni dot të bërë as në gjyqet më të egra të diktaturave. Pse? Sepse diktatura kishte bërë ligje mizore, të egra. Në emër të atyre ligjeve, njerëzit pushkatoheshin, vriteshin. Kurse për Millonain e lidhjeve obskure me Taulant Ballën, konsumohet korrupsioni duke respektuar ligjet”, tha Berisha.

Ndërkohë, për ish-kryeministrin mbeti në fuqi e njëjta masë sigurie “detyrim paraqitje”.