Manja: Nevojitet ndryshim në mentalitet dhe qasje e magjistratëve ndaj sistemit të drejtësisë penale

Ministria e Drejtësisë së bashku me Avokaten e Popullit, Erinda Ballanca, organizuam këtë të premte (9 shkurt) një sesion pune të përbashkët me aktorët kryesorë të sistemit të drejtësisë, për të diskutuar gjetjet e raportit të Komitetit për Parandalimin e Torturës (CPT) mbi trajtimin e të paraburgosurve dhe të dënuarve në Shqipëri.

Lajmin e bëri të ditur ministri i Drejtësisë, Ulsi Manja përmes një postimi në Facebook ku thekson se “dialogu konstruktiv synoi të bashkojë përpjekjet për të adresuar rekomandimet e CPT dhe të nisë një angazhim kolektiv për të kthyer gjetjet në plane vepruese për të gjithë aktorët institucionalë të përfshirë”, shkruan Manja.

Ministri i Drejtësisë shpreh domosdoshmërinë e një ndryshimi në mentalitetin dhe qasjen e magjistratëve ndaj sistemit të drejtësisë penale.

“Nevojitet me urgjencë një ndryshim në mentalitetin dhe qasjen e magjistratëve ndaj sistemit të drejtësisë penale, që në thelb respekton të drejtat dhe liritë e individëve. Le të ndërtojmë së bashku një shoqëri më të drejtë dhe më të barabartë!” thekson ministri Manja.