Marrëveshja e armëpushimit, Hamasi pritet të lirojë 33 pengje në fazën e parë

Hamasi pritet të lirojë 33 pengje gjatë fazës së parë të një marrëveshjeje armëpushimi që po finalizohet nga negociatorët në Doha.

Kjo është shenja e parë pozitive në muaj që duket në horizont për arritjen e një armëpushimi në luftën Izrael-Hamas.

Zyrtarët kanë shprehur optimizëm të kujdesshëm se së shpejti mund të shpallet një marrëveshje për të ndalur 15 muaj luftime që kanë destabilizuar Lindjen e Mesme dhe kanë shkatërruar Gazën, për të lejuar më shumë ndihmë në enklavën e rrethuar palestineze dhe për të siguruar kthimin e dhjetëra pengjeve të mbajtura nga Hamasi që nga sulmi i tij ndaj Izraelit më 7 tetor 2023.

“Hamasi dhe aleatët e tij ende mbajnë 94 nga 251 pengjet e marra nga Izraeli, duke përfshirë të paktën 34 prej të cilëve janë të vdekur”, sipas qeverisë izraelite.

Izraeli beson se shumica e 33 pengjeve që do të lirohen në fazën e parë të marrëveshjes, janë gjallë.

Faza e parë do të zhvillohej gjatë një armëpushimi fillestar 42-ditor.

Një zyrtar i lartë izraelit tha se palët duket se janë në prag të një marrëveshjeje dhe se Izraeli është i përgatitur të zbatojë menjëherë marrëveshjen pasi të jetë nënshkruar.

Presidenti amerikan Joe Biden shprehu optimizmin gjatë një fjalimi të mbajtur një ditë më parë (13 janar), duke thënë se Shtetet e Bashkuara po ushtrojnë presion për përmbylljen e kësaj marrëveshje.

“Marrëveshja që kemi strukturuar do të lirojë pengjet, do të ndalojë luftimet, do të sigurojë siguri për Izraelin dhe do të na lejojë të shtojmë ndjeshëm ndihmën humanitare për palestinezët që vuajtën tmerrësisht në këtë luftë që filloi Hamasi. Ata kanë kaluar nëpër ferr”, tha Biden.

Lirimi i 33 pengjeve do të ishte faza e parë e përfundimit të marrëveshjes. Negociatat për të arritur në fazën e dytë – e cila synon t’i japë fund luftës – do të fillonin në ditën e 16-të të zbatimit të marrëveshjes.

Sipas propozimeve të fundit, forcat izraelite do të mbajnë një prani përgjatë Korridorit të Filadelfit – një rrip i ngushtë toke përgjatë kufirit Egjipt-Gaza – gjatë fazës së parë të marrëveshjes. Prania e trupave izraelite përgjatë korridorit kontribuoi më parë në fundosjen e një marrëveshjeje të mundshme në shtator gjatë raundit të fundit të negociatave.

Izraeli gjithashtu do të mbajë një zonë tampon brenda Gazës përgjatë kufirit me Izraelin, pa specifikuar se sa e gjerë do të ishte ajo zonë – një tjetër temë mosmarrëveshjeje gjatë negociatave.