Marrëveshja për FRONTEX, Mahila: Mbron kufijtë e jashtëm të BE, adreson çështjet e emigracionit

Zv.ministri i Brendshëm Andi Mahila prezantoi risitë e projektligjit “Për Ratifikimin e Marrëveshjes, ndërmjet Shqipërisë e BE, për aktivitetet operacionale të Agjencisë Europiane e Rojës Kufitare dhe Bregdetare, FRONTEX, në Shqipëri” në Komisionin parlamentar të Ligjeve, i cili e miratoi atë. 

Mahila tha se kjo marrëveshje është propozuar nga BE, dhe parashikon që efektivët ushtrojnë kompetenca ekzekutive, në fushën e emigracionit të paligjshëm dhe krimeve kufitare. Ajo pason marrëveshjen statutore të tetorit 2018, dhe kjo marrëveshje e zgjeron atë. Shqipëria ishte i pari vend në rajon që pranoi FRONTEX dhe sot, i pari vend që zgjeron objektin e marrëveshjes.

Zv.ministri shtoi se që prej fillimit të operacionit në 2019, pati eficencë në operacionet e përbashkëta të Policisë Kufitare dhe FRONTEX për parandalimin e emigracionit të paligjshëm, identifikimin dhe goditjen e krimeve kufitare.

“Që prej fillimit të operacionit, ndërmjet 85% dhe 92% e emigrantëve të parregullt të kapur në vendin tonë, janë kapur në pikat e hyrjes, në zonën operacionale në Kapshticë dhe Kakavijë, ndërkohë që para fillimit të këtij operacioni, jo më shumë se 40% e të kapurve, kapeshin në pikat e hyrjes,” theksoi Mahila.

FRONTEX operon në Shqipëri prej 5 vitesh, në atë që njihet si kufiri i jashtëm i BE, në jug e juglindje të vendit, në kufirin me Greqinë. Marrëveshja e përmirësuar me FRONTEX hedh bazat e një bashkëpunimi edhe më cilësor e më të plotë me strukturat policore, pasi përmes këtij operacioni të përbashkët mund të adresohen më mirë çështjet e emigracionit të parregullt drejt Shqipërisë.

Eficenca e operacionit është e dukshme edhe në shkëmbimin e informacionit, që ka rezultuar në goditjen e suksesshme të shumë grupeve kriminale të përfshira në kontrabandimin e emigrantëve, ku vlen të përmendet kontributi në zhvillimin e operacioneve të suksesshme policore “Perimetri” në Korçë dhe “Muzgu” dhe “RoadGuard” në Gjirokastër.

Ajo u nënshkrua në shtator 2023, nga Ministri i Brendshëm Taulant Balla për Shqipërinë dhe në emër të Bashkimit Europian nga Johannes Luchner, Zv.drejtor i Përgjithshëm për Çështjet e Brendshme në Komisionin Europian, si dhe Álvaro Renedo Zalba, Ambasador i Spanjës në Tiranë, vendi i të cilit mbante Presidencën e Këshillit të BE.