Marrëveshja për refugjatët, Meloni: Shqipëria nuk është Gjermania naziste

Kryeministrja e Italisë, Xhorxha Meloni (o. Giorgia), vazhdon ta mbrojë akordin Itali-Shqipëri për refugjatët dhe frymën evropiane që vendi ka treguar duke e pranuar atë.

Duke iu drejtuar senatorëve italianë dhe e ndeshur me kritikat e opozitës, znj. Meloni përsëriti disa nga detajet e marrëveshjes. Pakti me qeverinë shqiptare parashikon që 36 mijë emigrantë nga Afrika të vendosen në Shëngjin derisa të procedohen kërkesat e tyre për azil.

“Është një marrëveshje novatore që tregon shpirtin evropian të bashkëpunimit. Nuk është një Guantanamo, as deportim: Shqipëria nuk është Gjermania naziste. E vetmja e drejtë që shkelet është ajo nga trafikantët e qenieve njerëzore,” u shpreh kryeministrja Meloni, duke kundërshtuar referencat se kampi në Shëngjin do të kthehet në një Guantanamo, në qendrën famëkeqe të trajtimit të të burgosurve pas sulmit terrorist të 11 Shtatorit në SHBA.