Mbahen zgjedhjet e përgjithshme në Holandë, qytetarët do të zgjedhin kryeministrin e parë të ri në 13 vjet

Qytetarët holandezë do t’i drejtohen sot (22 nëntor) kutive të votimit, në zgjedhjet e përgjithshme që do të sjellin kryeministrin e parë të ri të vendit në 13 vjet. Janë katër parti nga e majta në të djathtën ekstreme që konkurrojnë për t’u bërë më të mëdhatë në parlament.

Janë më shumë se 13 milionë votues që do të hedhin votën e tyre midis orës 7:30 dhe 21:00 në zgjedhjet që mund ta vendosin vendin në një kurs tjetër pas katër qeverive të njëpasnjëshme të Mark Rutte.

Me sondazhet e fundit që tregojnë një rritje të mbështetjes për Partinë e ekstremit të djathtë PVV të Geert Wilders, ditët e fundit të fushatës janë shënuar me diskutime mbi votat taktike dhe marrëveshjet e mundshme të koalicionit.

Udhëheqësja e Partisë Popullore liberale për Liri dhe Demokraci (VVD), Dilan Yeşilgöz-Zegerius , ka thyer precedentin duke thënë se do të punonte me Wilders nëse partia e saj merrte më shumë vota, edhe pse të martën ajo përjashtoi mundësinë që ta mbështeste atë si kryeministër nëse ai fitoi pjesën më të madhe.

Nëse VVD triumfon, Yeşilgöz-Zegerius , një ish-refugjate që përkrah kontrolle më të rrepta të migracionit, mund të bëhet kryeministrja e parë femër e Holandës./ The Guardian