Mbërrin në Portin e Shëngjinit anija e parë me emigrantët nga Italia

Ka mbërritur në portin e Shëngjinit kontingjenti i parë me emigrantë.

Sipas mediave italiane, në bordin e saj janë 16 persona, 10 nga Bangladeshi dhe 6 nga Egjipti. Ata ndodheshin në disa gomone të vogla të nisura nga brigjet libiane dhe u kapën mbrëmjen e së dielës në ujërat ndërkombëtare nga autoritetet italiane. Këta të fundit i transferuan emigrantët në anijen e marinës ushtarake “Libra”.

Në bordin e saj, emigrantët iu nënshtruan një kontrolli paraprak për të verifikuar nëse i plotësonin kërkesat e paracaktuara: të jenë meshkuj, të ardhur nga vende të sigurta dhe jovulnerabël.

Qendrat në Shëngjin dhe Gjadër, që duhet të ishin hapur që më 20 maj, u vunë në funksion javën e kaluar. Marrëveshja e nënshkruar nga  kryeministrat Rama dhe Meloni vitin e kaluar synon të luftojë trafikimin e qenieve njerëzore, të parandalojë flukset e parregullta migratore dhe të mirëpresë vetëm ata që kanë të drejtën e mbrojtjes ndërkombëtare.