Mbrëmja gala e KOKSH, Rama: Më shumë mbështetje për sportin. Të shtohen disiplinat në shkolla

I pranishëm në mbrëmjen ceremoniale për sportistët shqiptarë në arenën ndërkombëtare për vitin 2024 organizuar nga Komiteti Olimpik Kombëtar Shqiptar, kryeministri Edi Rama premtoi më shumë mbështetje për sportistët elitarë.

Rama vlerësoi se shpallja kampion për moshat e reja të sportistëve shqiptarë në arenën ndërkombëtare në disa disiplina, është premtuese për të ardhmen.

“Dua t’u siguroj që këtë mbështetje të veçantë që ne i kemi kushtuar sportit duke sjellë në rritje kontributin financiar për komunitetin do ta rrisim më tej. Kam parë rezultatet dhe kemi shumë kampion në mosha më të reja çka premton për më shumë kampionë në vitet në vijim që është një hall më vete për buxhetin. Por ne do të qëndrojmë me dinjitet dhe do t’i përgjigjemi angazhimeve të marra për sportistët elitarë“, theksoi kryeministri.

Kreu i qeverisë kërkoi edhe zgjerimin e disiplinave sportive në shkolla.

“Nuk mjafton të kemi vetëm volejboll e basketboll. Duhet të fusim sa më parë në shkolla shahun, mundjen, peshëngritjen apo të tjera disiplina”,  tha Rama drejtuesit të Komitetit Olimpik Shqiptar, Fidel Ylli.

Mbrëmja Ceremoniale për sportistët në Shqipëri u mbajt për të vlerësuar sportistët shqiptarë që kanë arritur rezultate të larta në disiplinat përkatëse gjatë 2024.

Sportistët që u vlerësuan janë: Nelia Kabetaj çiklizëm; Islam Dudaev, Shermen Valiev dhe Zelimkan Abakarov mundje; Klevina Kollashi, Enio Allushi, Adea Grumira dhe Klajdi Syla volejboll; Briken Calja, Erkand Qerimaj dhe Kristi Ramadani Peshëngritje; Lara Colturi në Ski; Luiza Gega, Franko Burraj, David Nikolli në atletikë; Ernest Merdanaj Taekuondo; Ira Mimini, Edrion Kuçi, Gledja Pulaj basketboll; Orges Arifi karate; Indrir Çullhaj, Erisa Brahimaj xhudo; Eklent Kaçi bilardo; Alban Beqiri boks; Marjan Hoxhaj, Xhesi Loci badibillding.