Mbrojtja e rezervave peshkore domosdoshmëri – Ekspertët: Heqja e instalimeve të paligjshme në liqen dhe Bunë, masa e duhur

Pinarët dhe dajlanet, të vendosura në mënyrë të paligjshme, në Liqenin  e Shkodrës dhe Lumin Buna pengojnë lëvizjen e lirë të peshqve, veçanërisht të specieve migratore.

 Sipas specialistëve të peshkimit kjo është e dëmshme gjatë pranverës, kur ndodh lëvizja më e madhe e peshqve.

Ndërhyrja e ditëve të fundit nga IKMT për heqjen e këtyre instalimeve vlerësohet si një masë e domosdoshme për mbrojtjen e resurseve peshkore.

Sipas ekspertëve, gjuetia pa kriter gjatë 30 viteve të fundit ka sjellë një mbishfrytëzim të liqenit, duke e kthyer atë në një amortizator të problemeve sociale.

Si pasojë, disa specie tipike të Liqenit të Shkodrës janë në rrezik zhdukjeje.

Sipas Bashkisë Shkodër, aksioni i IKMT me mbështetjen edhe të strukturave të tjera do të vijojë deri në pastrimin e plotë të liqenit dhe lumit Buna nga instalimet e paligjshme me synim mbrotjen e biodiversitetit të tyre.