Mbyllet  java e 12-të e superiores – Vllaznia në krye me pikë të barabarta me Partizanin

Me tre ndeshjet e luajtura të hënën, Bylis-Laçi, barazim 0 me 0, Partizani-Teuta 1-1 dhe Elbasani-Dinamo 0-5, është mbyllur java e 12-të e kampionatit kombëtar të futbollit “Abissnet Superiore”.

 Më herët, pasditen e së dielës janë luajtur edhe dy sfidat e para, ku Vllaznia mundi Skënderbeun 2 me 0, ndërkohë që Egnatia mundi Tiranën 1-0.

Pas këtyre rezultateve, Vllaznia ka marrë kryesimin e kampionatit të Superiores me 21 pikë, po aq sa ka edhe Partizani i vendit të dytë, por me golaverazh më të dobët sesa kuqeblutë. Dinamo është e treta me 20 pikë e ndjekur në vendin e katërt nga Egnatia me 19 pikë.

 Elbasani dhe Teuta ndajnë vendin e pestë dhe të gjashtë me nga 16 pikë, pastaj, nga vendi i shtatë deri tek i nënti janë tre skuadra me pikë të barabarta: Laçi, Tirana, Skënderbeu me nga 11-të pikë secila.

 Skuadra e fundit që mbyll tabelën e klasifikimit është Bylisi që ka vetëm 10 pikë. Java e 13-të e Abissnet Superiore do të luhet këtë fundjavë e ndarë në dy ditë, të shtunën dhe të dielen.

 Dy takimet e para Egnatia-Vllaznia dhe Teuta-Skënderbeu luajnë të shtunën në orën 14:00, ndërkohë që ndeshja e tretë e kësaj dite është ajo Dinamo-Partizani, e cila luhet në orën 17:00.

Dy ndeshjet e fundit që mbyllin javën e 13-të të kategorisë Abissnet Superiore janë Laçi-Elbasani dhe Tirana-Bylis, e para e planifikuar të luhet në orën 14:0 dhe e dyta, Tirana-Bylis, në orën 17:00.