Mbyllet raundi i parë i regjistrimeve në universitete

Në përmbyllje të raundit të parë të regjistrimeve kanë mbetur më pak se 4000 mijë maturantë të cilët pritet t’i nënshtrohen raundit të dytë, për të plotësuar kuotat e mbetura bosh.

Sipas të dhënave nga Rrjeti akademik Shqiptar, degët që janë ezauruar 100 përqind në Tiranë janë Mjekësia e Përgjithshme, Stomatologjia dhe Farmacia.

Ndërsa dega e Infermierisë në Universitetin e Durrësit është drejt plotësimit në masën 100 përqind, degë e cila në universitetin e Shkodrës i ka plotësuar të gjitha kuotat.

Fakulteti i Arkitekturës nuk ka më asnjë vend të mbetur bosh, ndërsa shumë pranë ezaurimit është dega e Informatikës, e cila ka plotësuar 99 përqind të kuotave të saj.

Në rrethe, plotësimi i kuotave ka shkuar në 50 përqind, ku kandidatët do kenë më shumë shanse në raundin pasardhës.

Shpresa ka edhe për maturantët të cilët nuk janë fitues në raundin e parë, të cilët mund të aplikojnë në raundin e dytë brenda tre ditëve nga 19-21 shtator, ku më 26 shtator do të jenë shpallur fituesit, që kanë të drejtë të regjistrohen deri në 7 tetor, datë kur nis edhe viti i ri akademik.

Nëse do të ketë të penduar për fakultetin ku janë regjistruar, mundësia e fundit e ç’regjistrimit do të jetë nga 8-9 tetor dhe një fazë e lirë do të hapet nga 10-25 tetor për të gjitha fakultetet ku kanë mbetur kuota të paplotësuara.

Këtë vit, programet 2-vjeçare fituan epërsi krahasuar me një vit më parë gjatë fazës së aplikimeve, ku janë regjistruar edhe maturantë mbi mesataren 6.5.