Meloni në Shtëpinë e Bardhë, Trump: 100% i sigurt për një marrëveshje tarifore me BE
Kryeministrja italiane, Giorgia Meloni zhvilloi një takim me presidentin amerikan Donald Trump në Shtëpinë e Bardhë, teksa të dy udhëheqësit thanë se janë optimistë se bisedimet e tyre do të çojnë në një marrëveshje tregtare SHBA-Itali.
Donald Trump, duke mirëpritur kryeministren italiane Giorgia Meloni, tha se ishte “100 për qind i sigurt” se do të kishte një marrëveshje për tarifat me Bashkimin Evropian. Meloni, nga ana e saj, ra dakord, duke i quajtur Shtetet e Bashkuara një “partner të besueshëm”.
“Unë mendoj se ajo është një kryeministre e shkëlqyer. Unë mendoj se ajo po bën një punë fantastike”, tha Donald Trump pas ardhjes së Melonit.
Nga ana e saj, Meloni tha se ishte e sigurt se mund të arrinte një marrëveshje me Donald Trump.
“Jam e sigurt se mund të bëjmë një marrëveshje. Unë jam këtu për të ndihmuar me këtë. Unë mendoj se mënyra më e mirë është të jesh i sinqertë“, tha ajo.
Kryeministrja italiane është liderja e parë evropiane që takohet me presidentin amerikan pas vendosjes së tarifave për importet evropiane.
Giorgia Meloni siguroi takimin si udhëheqëse e Italisë, por do të përfaqësojë edhe BE-në në një moment kritik të luftës tregtare.
Ajo kishte qenë në kontakt të ngushtë me presidenten e Komisionit Evropian Ursula von der Leyen para udhëtimit dhe “qasja është e koordinuar ngushtë”, tha një zëdhënës i Komisionit.
“Ne e dimë se jemi në një moment të vështirë. Sigurisht, unë e di shumë mirë se çfarë përfaqësoj“, tha Meloni këtë javë në Romë.
Liderët europianë e konsiderojnë mjaft kritik këtë takim, pasi besojnë se në këtë mënyrë do të mund të zbulojnë qëllimet e presidentit amerikan, por edhe nëse kanë terrenin e duhur për të kapërcyer krizën që ka pasuar tarifat e vendosura nga Trump.
Kujtojmë se tarifat janë pezulluar për 90 ditë, duke i dhënë BE-së dhe SHBA-së një shans për të negociuar.
