Meloni zbulon planin për të zgjeruar ndikimin italian në Afrikë

Kryeministrja italiane, Xhorxha (Giorgia) Meloni është gati të shpallë planin e saj të madh për Italinë në Afrikë, për frenimin e migracionit të paligjshëm.

I ashtuquajturi plani Mattei, i quajtur pas Enrico Mattei, themeluesit e kompanisë së naftës Eni, do të prezantohet këtë të hënë në Romë para një mori liderësh nga Afrika dhe Evropa, përfshirë presidenten e Komisionit Evropian, Ursula von der Leyen.

Meloni njoftoi planin e saj për Afrikën menjëherë pasi qeveria e saj e ekstremit të djathtë mori detyrën në tetor 2022, me qëllimin kryesor për të transformuar Italinë në një qendër energjetike ndërsa Evropa po largohej nga gazi rus.

Megjithëse detajet e shtrirjes më të gjerë të planit deri më tani kanë qenë të pakta, një projekt-dekret i miratuar në nëntor parashikon që Italia të marrë atë që Meloni e ka përshkruar si një qasje “jo grabitqare” për të ndihmuar vendet afrikane në fusha duke përfshirë arsimin, shëndetin, eksportet dhe infrastrukturën.

Një prioritet për Melonin në këmbim të ndihmës së ekonomive afrikane për të përparuar është frenimi i fluksit të emigrantëve nga Afrika, një premtim zgjedhor që ajo deri më tani nuk ka arritur ta përmbushë.

Meloni ndërmori gjithashtu hapin e pazakontë të organizimit të samitit në Palazzo Madama, selia e senatit italian, një veprim i kritikuar nga partitë opozitare që e akuzuan atë për “kapjen” e ndërtesës.

Udhëheqësit nga 23 kombe dhe organe afrikane do të marrin pjesë në samit.