Milani rigjen suksesin në transfertë, Empoli dorëzohet pa kushte

Milani rikthehet të fitojë në kampionat larg shtëpisë pas 3 muajsh, pasi ka mposhtur në “Castellani” me rezultatin e pastër 3-0 Empolin. Kuqezinjtë e Piolit zhbllokojnë shumë shpejt sfidën me Loftus-Cheek, që dërgon në rrjetë një pasim të saktë nga Leao.

Giroud dyfishon shifrat nga pika e bardhë e penalltisë në minutën e 31-të, ndërsa në pjesën e dytë në fundin e takimit është Traore, ai që shënon golin e parë në kampionat me fanellën e Milanit dhe vulos fatin e kësaj sfide.

Pas këtij suksesi kuqezinjtë ngjiten në kuotën e 39 pikëve në tabelën e klasifikimit (vendi i tretë) dhe konsolidojnë pozitat në zonën Champions, ndërsa Empoli mbetet në zonën e ftohtë që të zbret në Serie B (vendi i parafundit me 13 pikë në 19 ndeshje).

Mbrojtësi i kombëtares shqiptare Ardian Ismajli ka luajtur gjatë gjithë ndeshjes për skuadrën toskane, ndërsa Berisha dhe Shpendi kanë qëndruar në stol.