Ministrja e jashtme gjermane: Kosova të plotësojë sa më shpejt kushtet. Gërvalla: I kemi plotësuar të gjitha

Zyrtarët e lartë gjerman këmbëngulën sërish të premten që Kosova të plotësojë sa më shpejt kushtet që të bëhet pjesë e Këshillit të Evropës.

Krye diplomatja gjermane, Analena Baerbock, vlerëson se plotësimi i kushteve sa më shpejt që të jetë e mundur, do të bëjë që Gjermania të inkurajrojë shumicën e vendeve për pranimin e Kosovës në Këshillin e Evropës.

“Ky themel i vlerave ka tërheqje – veçanërisht për demokracitë e reja. Të gjithë të përfshirët dhe të gjithë përgjegjës në Kosovë tani duhet të bëjnë gjithçka për të siguruar që shumica e kërkuar në favor të anëtarësimit të Kosovës në Këshillin e Evropës të arrihet së shpejti”, tha ajo.

Por për ministren e Punëve të Jashtme dhe Diasporës, Donika Gërvalla, Kosova i ka plotësuar kushtet, por është lobimi i Serbisë dhe ndonjë kundërshtar i Kosovës që nuk mundësoi anëtarësimin e Kosovës në KiE.

Gërvalla ka shtuar se Kosova i ka plotësuar të gjitha kriteret e kushtet për anëtarësim në Këshillin e Evropës (KiE).

“Anëtarësimi i Republikës së Kosovës nuk mund të ndalet, edhe nëse vonohet për shkak të ndonjë kundërshtari të Kosovës apo lobimit të Serbisë. Jemi në rrugë të drejtë dhe po bëjmë punë të mbarë. Nuk kemi lënë gur pa lëvizur, gjithnjë përbrenda kushtetutshmërisë e ligjshmërisë, për interesin e Kosovën”, ka thënë Gërvalla.

Sipas saj, megjithëse sot ishte dita kur do të duhej të votohej anëtarësimin e Kosovës në këtë organizatë dhe në këtë formë të dërgohej një mesazh i fuqishëm për të drejtat e njeriut, demokracinë dhe sundimin e ligjit në 75-vjetorin e themelimit të Këshillit të Evropës dhe në vigjilje të 25-vjetorit të çlirimit të Kosovës.

“Ministrat e punëve të jashtme të vendeve anëtare nuk e futën në agjendën e sotme dhe nuk morën vendim për thirrjen e një mbledhje të jashtëzakonshme për anëtarësimin pa vonesë të Republikës së Kosovës”, tha ajo.

Sipas saj, ky qëndrim është në shpërputhje me thirrjen e Asamblesë Parlamentare të Këshillit të Evropës, e cila në Opinionin e saj tha se Kosova duhet të anëtarësohet, pa parakushte shtesë.

“Duke qenë se vendit i ishte vendosur një parakusht i vonshëm, joformal e arbitrar, Qeveria e Republikës së Kosovës bëri një propozim dje (përmes një oferte të shënuar në një komunikim përmes letres drejtuar KiE-së) të arsyeshëm për tejkalimin e bllokadës që kishte krijuar ky parakusht i fundit. Edhe pse oferta jonë, e konsultuar me partnerë të shteteve anëtare, në këmbim të një vendimi pozitiv sot në Komitet të Ministrave ofroi një platformë të gjerë të punës së përbashkët, ajo ofertë nuk u mor parasysh. Rrjedhimisht ajo letër me ofertë e humbi vetvetiu aktualitetin dhe relevancën pas mbledhjes së sotshme të Komitetit të Ministrave”, ka shkruar Gërvalla në faqen zyrtare në ‘Facebook’.