“Mjeda – Poezia” / Promovohet vëllimi më i ri, që i shtohet kolanës së botimeve për Ndre Mjedën

Kolanës së botimeve kushtuar Ndre Mjedës, të realizuara nga studiuesi, Mentor Quku, i është shtuar së fundmi një tjetër vëllim, i cili fokusohet në poezinë e poetit të madh shqiptar.

 Kjo vepër u realizua me iniciativën e Valbona Quku Lisha, vajza e të ndjerit Mentor Quku, si një vazhdimësi e punës së palodhur të studiuesit në ndriçimin dhe promovimin e krijimtarisë së Mjedës.

Vepra “Mjeda – Poezia” përmbledh studime, analiza dhe qëndrime mbi poezinë e Ndre Mjedës nga disa prej emrave më të njohur të letrave shqipe.

Ky botim vlerësohet si një kontribut i çmuar në kulturën dhe letërsinë shqiptare.

Promovimi i këtij vëllimi dhe i gjithë kolanës për Mjedën, u mbajt në bibliotekën “Marin Barleti” në Shkodër, pikërisht në datën 7 Mars, një ditë me simbolikë të veçantë për arsimin dhe mësuesit. Kjo zgjedhje nuk ishte e rastësishme, pasi Mentor Quku ishte një nga mësuesit e shquar shkodranë, i cili ka lënë gjurmë të rëndësishme në fushën e studimeve mbi Mjedën dhe letërsinë shqipe.