“Mjekët s’mund ta ndalonin të luante”, drejtori i Egnatias zbulon të vërtetën me Duamenën: Ai mendonte se…

Media prestigjioze angleze, “The Athletic”, i ka kushtuar një speciale të gjatë tragjedisë së sulmuesit ganez Rafael Duamena, i cili u nda nga jeta më 11 nëntor, ku gjatë ndeshjes Egnatia-Partizani pësoi arrest kardiak në fushën e lojës. Në këtë shkrim të gjatë janë pyetur protagonistë të të gjitha klubeve ku 28-vjeçari ka lënë gjurmë.

Mes tyre është edhe drejtori i përgjithshëm i Egnatias, Klejdi Zenelaj, i cili për median britanike ka sqaruar historikun e Duamenës në klubin rrogozhinas.

Pjesa e shkrimit:

“Stadiumi ‘Demrozi’ i Egnatias, në qytetin e vogël shqiptar të Rrogozhinës, është një stadium modest, me vetëm njërën anë të hapur për spektatorë. Pikërisht këtu, të shtunën, më 11 nëntor, Rafael Duamena, lojtari më i vlerësuar i ligës dhe golashënuesi më i mirë me nëntë gola, u rrëzua dhe vdiq gjatë një ndeshjeje kundër FK Partizanit.

Njëzet e katër minuta pasi kishte nisur ndeshja, një video tregon arbitrin dhe lojtarët nga të dyja palët që nxitojnë për të ndihmuar dhe stafin mjekësor që angazhohet te Duamena i shtrirë në fushë.

Një ambulancë hyn në fushë brenda një minute, pasi ai u rrëzua në tokë, ndërsa lojtarët e dëshpëruar shikojnë larg me duart në kokë Duamena u dërgua në spitalin e Kavajës, 20 minuta larg me makinë, por u shpall i vdekur para se të arrinte atje. Vdekja e tij, në moshën 28-vjeçare, tronditi komunitetin e futbollit dhe homazhet u përhapën nga e gjithë bota. Megjithatë, ajo gjithashtu ngre pyetje të vështira dhe shqetësuese.

Drejtori i përgjithshëm i Egnatias, Klejdi Zenelaj, këmbënguli se klubi i kishte kryer kontrollet e duhura mjekësore Duamenës dhe kishte ndjekur protokollet e Federatës Shqiptare të Futbollit. Ai shtoi se klubi i ka bërë tri kontrolle mjekësore Duamenës që nga ardhja e tij në dhjetor 2022.

“Në fund, ai vendosi të luante, është jeta e tij. Ai mund të vendosë për sa kohë që të gjitha testet janë bërë nga klubi… dhe gjithçka ishte në rregull”, tha Zenelaj që vazhdoi. Kjo është historia e një futbollisti të talentuar, i cili nuk mundi të hiqte dorë nga loja që donte. Në dhjetor 2022, Duamena iu bashkua FC Egnatia në Shqipëri, një klub, i cili luajti në raundin e parë kualifikues të “Europa Conference League” këtë sezon.

Në Shqipëri, Duamena jetonte në një hotel të paguar nga klubi me Amën, më pas një apartament në Kavajë. Duke pasur parasysh historinë e tij mjekësore, pse u lejua Duamena të luante për Egnatian? Klubi këmbëngul që Duamena kishte kaluar të gjitha kontrollet e nevojshme mjekësore. Ata thanë se nuk kishte nevojë që ai të nënshkruante një heqje dorë nga rreziku pasi “mjekët thanë se ai kishte kaluar të gjitha testet mjekësore”.

Drejtori i përgjithshëm i Egnatia, Klejdi Zenelaj, tha për “The Athletic”:

“Ai ishte shumë i mirë, kishim marrëdhënie perfekte. Jemi të trishtuar, por jeta vazhdon. Të gjithë janë të tronditur, i gjithë komuniteti është. Ai kaloi gjithçka nga ana mjekësore para se të vinte në klub. Ai erdhi këtu në janar, tani jemi në nëntor dhe bëmë tri kontrolle dhe gjithçka ishte mirë. Kudo që i kaloi testet, në Levante, Zaragoza, Danimarkë, por pas kësaj ai ka pasur probleme. Ai hoqi defibrilatorin. Ne folëm me të për këtë, por ai tha se i kishte shkaktuar probleme. Ai besonte se ky ishte problemi.”

Zenelaj shtoi se klubi tani do të jetë më i fortë me testimin e tyre. Agjenti i Duamenës në Shqipëri tha se lojtari kishte “kontrolle të dyfishta, të trefishta mjekësore për gjithçka” dhe mund të kishte kaluar teste mjekësore “kudo në botë… sepse zemra e tij nuk ka probleme për të kaluar testet mjekësore, kjo është e vërteta”.

Ai shtoi: “Kam kontrolluar historinë e tij mjekësore disa herë, madje edhe me mjekë. Ai besonte shumë në Zot. Ai po luftonte kundër gjërave mjekësore. Ky ishte vendimi i tij personal. Ai tha shumë herë: ‘Nëse fati im do të jetë të vdes në fushë, atëherë nuk ka rëndësi. Kjo është jeta ime dhe unë dua të vendos’. Asnjë nga mjekët nuk mund ta detyronte atë të ndalonte së luajturi futboll.”

Zenelaj e përshkroi Duamenën si “frymëzim për të gjithë ekipin”. “Shokët e tij të skuadrës janë shumë të trishtuar”, shtoi ai. “Do të jetë një punë e vështirë për t’i marrë ata, por ne duhet të luajmë për të.”

Si klubi ashtu edhe agjenti pretenduan se kishte plane që ai të nënshkruante për një klub tjetër në janar, me oferta nga klube në Europën Lindore, Dubai, Katar dhe Arabinë Saudite.