Mori famë ndërkombëtare në filmin fitues të çmimit Oskar, gjendet i vdekur aktori i “Parasite”
Lee Sun kyun
Aktori koreano-jugor Lee Sun-kyun, i njohur më së shumti për rolin e tij në filmin fitues të çmimit Oskar “Parasite”, është gjetur i vdekur.
Aktori, 48 vjeç, u gjet pa shenja jete në një makinë në një nga parqet kryesore të Seulit. Është e paqartë nëse Lee u vetëvra, por sipas policisë, ai kishte lënë një shënim para se të largohej nga shtëpia.
Ai ishte nën hetim për përdorim droge. Sipas mediave vendase, aktori dyshohej se merrte drogë si marihuanë dhe ketaminë.
Aktori, i cili ishte i martuar me aktoren Jeon Hye-jin dhe kishte dy djem të vegjël me të, kishte një karrierë që zgjati më shumë se dy dekada.
Ai luajti si aktori kryesor në dhjetëra filma dhe shfaqje televizive, duke u bërë një emër i njohur gjatë viteve 2010.
Ai fitoi famë ndërkombëtare si Park Dong-ik në Parasite, babai i familjes së pasur Park, në të cilën u infiltruan anëtarët e një familjeje të varfër. Filmi mori katër çmime në Oskar në 2020./ BBC
