Mot i keq në veri, në zonat malore të Shkodrës reshje bore, në Lezhë pezullohet lundrimi

Rajoni i Shkodrës është përfshirë nga moti i keq. Në aksin Bogë – Qafë Thore, vijojnë reshjet e dëborës me intensitet mesatar. Mjetet borëpastruese po punojnë për pastrimin e rrugës dhe shpërndarjen e kripës, ndërsa qarkullimi kryhet pa probleme . Policia e Shteti i bën apel përdoruesve të rrugës, të lëvizin me shpejtësi të reduktuar, të përdorin goma dimërore, në zonat me reshje bore, të respektojnë sinjalistikën rrugore.

Ndërkohë, edhe Rajoni i Lezhës është përfshirë nga era e fortë me stuhi shiu. Kjo situatë ka sjellë pezullimin  e lundrimit detar për peshkarexhat dhe mjetet e vogla të peshkimit në Shëngjin. Forca e dallgëve të detit ka arritur deri ne 8 ballë dhe shpejtësia e erës është mjaft e fortë. Po ashtu stuhia ka sjellë probleme dhe me furnizimin me energji elektrike në disa zona, pasi ka dëmtim të linjave. Grupet e punës të Operatorit të Shpërndarjes së Energjisë elektrike ndodhen në terren dhe po punojnë për riparimin e defekteve, ndërsa moti i keq pritet të jetë prezent edhe gjatë ditës së martë.