Moti i keq, përmbytet qyteti, përmbytet blloku “11 janari”, stuhia dëmton linjat elektrike
Reshjet e dendura të shiu, të nisura që prej mbrëmjes të së mërkures, kanë krijuar probleme në Lezhë. Situata më problematike u paraqit në qytet, pasi kanalizimet nëntokësore nuk e përballuan nivelin e prurjeve dhe ujërat dolën në siperfaqe.
Në bllokun e banimit “11 Janari” të lagjes “Besëlidhja”, u përmbytën rrugë e trotuare, pasi niveli i ujit arriti deri në 30 cm duke bllokuar dhe hyrjet e pallateve. Kjo situatë krijoi vështirësi në lëvizjen e automjeteve dhe qytetarëve, ndërsa Ndërmarrja e shërbimeve publike në Bashkinë Lezhë doli në terren për zhbllokimin e pusetave me qëllim evadimin sa më të shpejtë të ujërave.
Moti i keq me stuhi shiu solli probleme dhe me furnizimin me energji elektrike.Pjesa më e madhe e fshatrave kanë qenë në errësirë gjatë natës, ndërsa po punohet në riparimin e defekteve dhe rikthimin e energjisë në zonat ku aktualisht mungon.