Muzeu i FA-së në Bërzhitë, Rama: Destinacion turistik i një historie politike unikale të ushtrisë shqiptare

Kryeministri Edi Rama ndau këtë të diel (7 prill) në rrjetet sociale momente nga fundjava në Muzeun e Forcave të Armatosura në Bërzhitë që tashmë duket se është kthyer në një destinacioni turistik.

Krahas pamjeve, kryeministri thekson se muzeu ofron edhe një hapësirë të gjelbër e një vendpushim kafeje, ku vizitorët shijojnë ajrin e pastër të rrethuar nga objekte të kujtesës e të traditës shqiptare.

“Fundjava në Muzeun e Forcave të Armatosura në Bërzhitë, Tiranë, destinacioni turistik i një historie politike unikale të ushtrisë shqiptare, e cila gjatë komunizmit u armatos deri në dhëmbë për të luftuar me tërë botën, në Shqipërinë e izoluar si një Kore e Veriut, në mes të Europës, ndërkohë që muzeu ofron edhe një hapësirë të gjelbër e një vendpushim kafeje, ku vizitorët shijojnë ajrin e pastër të rrethuar nga objekte të kujtesës e të traditës shqiptare”, shkruan Rama.

Muzeu i Forcave të Armatosura në Bërzhitë, Tiranë, ka 5 pavijone të veçanta ku ekspozohen përmes metodave, teknikave dhe teknologjive bashkëkohore objekte, mjete, informacione e harta të periudhave që nga Iliria e deri në ditët e sotme.