Mynih, disidentët iranianë protestojnë jashtë ambienteve të Konferencës së Sigurisë

Kritikët e qeverisë iraniane kanë paralajmëruar për rrezikun e një vale ekzekutimesh ndërsa protestonin kundër regjimit iranian jashtë ambienteve të Konferencës së Sigurisë në Mynih, e cila nisi të premten.

Rreth 250 mbështetës të Këshillit Kombëtar të Rezistencës së Iranit (NCRI) u mblodhën duke u bërë thirrje Kombeve të Bashkuara dhe pjesëmarrësve në Konferencën e Sigurisë në Mynih që të ndërmerrnin veprime më të qëndrueshme kundër udhëheqjes shtetërore në Teheran.

Protestuesit dënuan sjelljen brutale të qeverisë iraniane duke thënë se të paktën 83 persona ishin ekzekutuar vetëm në muajin janar.

Që nga shpërthimi i luftës së Izraelit në Rripin e Gazës, sipas aktivistëve, ka pasur rreth 400 ekzekutime në Iran.

“Komuniteti ndërkombëtar duhet të marrë urgjentisht masa efektive për të ndaluar valën e vazhdueshme të ekzekutimeve në Iran”, tha një pjesëmarrës në demonstratë.

Protestuesit kërkuan që Bashkimi Evropian të futi Korpusin e Gardës Revolucionare Islamike të Iranit (IRGC) në listën e terrorizmit të BE-së, të riaktivizojë sanksionet e OKB-së kundër projektit bërthamor iranian dhe të klasifikojë qeverinë iraniane si një kërcënim për paqen botërore.

Ata gjithashtu u bënë thirrje liderëve botërorë që të njihnin luftën e aktivistëve dhe demonstruesve kundër regjimit brenda Iranit.