Napoli synon të rikthejë Kiezën në kampionatin italian

Liverpuli i Arne Slot është një makineri. “Të kuqtë” janë të parët në Premier League dhe tashmë janë kualifikuar në Champions League, ku deri tani kanë vetëm fitore. Problemi i vetëm tek klubi anglez duket se është Federico Chiesa.

Që nga fillimi i sezonit, ish-lojtari i Juventusit, i cili mbërriti në Angli në verë për 15 milionë euro, ka dalë në fushë vetëm katër herë për gjithsej 123 minuta dhe për këtë arsye me afrimin e merkatos të janarit, klubi dhe lojtari janë në kërkim të një zgjidhjeje për t’i dhënë më shumë minuta dhe për ta lejuar të rifitojë fanellën e kombëtares dhe zgjidhja më logjike duket të jetë rikthimi në Serie A.

Një situatë që Napoli mund ta shfrytëzojë, pasi është shumë i interesuar për lojtarin, siç e dëshmon edhe fakti se ditët e fundit ka ndodhur një kontakt mes klubit italian dhe agjentit të lojtarit. Antonio Conte do të kishte dhënë miratimin e tij dhe do të kishte një gatishmëri nga ana e lojtarit për t’u transferuar në “Maradona” për të ndihmuar skuadrën të arrijë objektivat e saj sezonale.

Operacioni mund të materializohej me formulën e huazimit, por që në bisedimet e para mes palëve është një problem që lidhet me pagën e Kiezës, që fiton 7.5 milionë euro neto dhe për këtë arsye drejtori sportiv i Napolit, Giovanni Manna, do të përpiqet të bindë anglezët që të mbulojnë një pjesë të pagës së tij.