Nata e parë e Fest 62 / Publiku mirëpriti 16 këngët pjesëmarrëse të natës së parë të festivalit

Mes emocionesh, performacash, ritmesh, baladash, por edhe të ftuarve specialë, është përmbyllur nata e parë e festivalit të këngës në Radio Televizionin Shqiptar.  Publiku mirëpriti me duartrokitje 16 këngë që tashmë do jenë pjesë e fondit të artë të këngës së lehtë shqiptare. Umberto Toci ishte i ftuar special i natës së parë të festivalit të 62 të këngës në RTSH. Publiku në sallë, por edhe gjithë teleshikuesit shqiptarë patën mundësinë të dëgjonin këngët e tij me të njohura. Kënga fituese e festivalit të 62 në RTSH do të shpallet nga një juri profesioniste e përbërë prej 11 personalitetesh. Juria ka emrat me të shquar të artit, këngëtarë, kompozitorë, orkestrantë dhe shkrimtarë.

Votimi për të përzgjedhur këngën, e cila do të dërgojë Shqipërinë në festivalin e këngës evropiane do të hapet në fund të natës së dytë dhe do të qëndrojë i hapur deri në fund të natës së fundit të festivalit. Vota e publikut përzgjedh këngën që do përfaqësojë Shqipërinë në Eurovizion.

Parafestivali është një risi që vjen këtë vit i menduar nga organizatorët si një pritje në tapetin e kuq për të gjithë artistët , prezantuesit, por edhe anëtarët e jurisë. Nata e parë e festivalit të këngës ka patur shikueshmëri dhe ecuri të kënaqshme edhe në rrjetet sociale.