NATO dërgon 130 trupa nga Rumania në Kosovë: Për garantimin e një mjedisi të sigurt

NATO ka njoftuar se më shumë se 130 trupa shtesë nga Rumania kanë arritur në Kosovë për të përforcuar më tej misionin paqeruajtës të Forcave të KFOR-it.

Ndërkohë, në fillim të muajit në Kosovë u dislokuan 200 trupa  të tjera britanike. 

NATO njofton se vendosja e këtyre trupave shtesë vjen pas sulmit të dhunshëm ndaj Policisë së Kosovës më 24 shtator dhe rritjes së tensioneve në rajon.

“Këto dislokime janë një hap i kujdesshëm për të siguruar që KFOR-i të ketë forcat që i nevojiten për të përmbushur mandatin e tij të OKB-së për të ruajtur një mjedis të sigurt dhe lirinë e lëvizjes për të gjithë njerëzit në Kosovë. Ato bazohen në një kërkesë të Komandantit Suprem të Aleatëve të NATO-s për Evropë dhe u miratuan nga Aleatët në Këshillin e Atlantikut të Veriut”, thuhet në njoftimin e NATO-s.

Që nga viti 1999, NATO ka drejtuar operacionin paqeruajtës në Kosovë në përputhje me mandatin që i është dhënë nga rezoluta 1244 e këshillit të sigurimit të OKB-së.

Aktualisht KFOR përbëhet nga mbi 4500 trupa të 27 vendeve anëtare dhe partnerëve të Aleancës.