Ndeshja Shqipëri-Çeki/ Balla: Mirënjohje për 2300 punonjësit e policisë, meritojnë përgëzime

Ministri i Brendshëm Taulant Balla, ka përgëzuar 2300 punonjësi e policisë, të angazhuar mbrëmjen e djeshme për mbarëvajtjen e ndeshjes mes Shqipërisë dhe Çekisë.

“Meritojnë një përgëzim të madh 2300 punonjësit e policisë nga të gjitha strukturat e Policisë së Shtetit, të përfshira në mbarëvajtjen e aktiviteteve dhe festimeve, përpara, gjatë dhe pas përfundimit të ndeshjes së futbollit mes Shqipërisë dhe Republikës Çeke”, shkruan Balla.

Gjithashtu, ministri ka shprehur mirënjohje edhe për qytetarët, që sipas tij mirëkuptuan masat e rrepta të policisë, dhe nuk shkaktuan incidente.

“Shumë mirënjohje qytetarëve që i mirëkuptuan masat e rrepta në këtë nivel të ri sigurie në stadiume, i cili mori dhe vlerësimin maksimal nga përfaqësuesit e UEFA, FSHF dhe Federata Çeke”.

Ministri e mbyll mesazhin e tij duke falenderuar dhe uruar lojtarët e Kombëtares, të cilët arritën një fitore mbresëlënëse ndaj Çekisë, me rezultatin 3-0.