Ndeshja Shqipëri – Gjeorgji, policia plan masash. Nga ora 15.00 bllokohen disa akse

Policia e Shtetit ka ndërmarrë një plan masash për mbarëvajtjen dhe sigurinë e zhvillimit të ndeshjes ndërkombëtare të futbollit Shqipëri – Gjeorgji. Ndeshja do të zhvillohet sot në orën 20:45, në stadiumin “Air Albania” në Tiranë.

Për shkak të mbarëvajtjes së ndeshjes disa akse rrugore do të jenë të bllokuara nga ora 15.00 e ditës së sotme (10 shtator) deri në përfundim të ndeshjes.

Rrugët që do të jenë të bllokuara:

* Bulevardi “Dëshmorët e Kombit”, 20 m mbi urën e Dajtit; 

* Rruga “Papa Gjon Pali II”; 

* Rruga “Dervish Hima”, pranë ambasadës së SHBA-së;

* Rruga “Asim Zeneli”, pranë ambasadës së SHBA-së;

* Rruga “Themistokli Gërmenji”;

* Rruga “Ismail Qemali”, kryqëzimi i Liceut;

* Rruga “Mustafa Matohiti”, pranë shkollës “Kosova”;

* Rruga “Jul Variboba”, pranë postës;

* Rruga “ Lekë Dukagjini”, pranë ish-Gardës së Republikës;

* Rruga “Avdyl Frashëri”, pranë kryqëzimit të Librit Universitar.

Policia do të bëjë shoqërimin dhe sigurimi i futbollistëve të ekipit të Gjeorgjisë, nga aeroporti i Rinasit, në hotel, në stadium dhe në kthim për në Rinas si dhe shoqërimin e futbollistëve të ekipit të Shqipërisë, në stadium.

Në zbatim të planit të masave, punonjësit e policisë do të ushtrojnë kontroll të imtësishëm ndaj tifozëve, para futjes në stadium, me qëllim parandalimin e futjes në stadium, të banderolave me përmbajtje raciste, të fishekzjarrëve, flakadanëve, lëndëve piroteknike, monedhave metalike, çadrave, çakmakëve, karikuesve të celularëve, mjeteve/produkteve për përdorim kozmetik dhe sendeve të tjera të forta, të rrezikshme për jetën dhe shëndetin e pjesëmarrësve.

Policia paralajmëron se në raste të veprimeve të dhunshme në aktivitetet sportive, si hyrja në fushën e lojës gjatë kohës së zhvillimit të aktivitetit sportiv nga persona të paautorizuar, përbën kundërvajtje penale dhe dënohet me gjobë nga 50 000 deri në 100 000 lekë. Kur nga kjo vepër, ka ardhur pengimi i zhvillimit normal të aktivitetit sportiv, dënohet me gjobë ose me burgim deri në tre muaj.

“Hedhja e sendeve të forta në fushën e lojës ose mbi njerëzit, mbajtja apo përdorimi i lëndëve piroteknike, fishekzjarrëve, flakadanëve, gjatë zhvillimit të një aktiviteti sportiv, dënohen me burgim nga gjashtë muaj deri në tre vjet”, njofton policia.

Hyrja në stadium e tifozëve dhe e sportdashësve do të nis në orën 18:00.