Ndihmë juridike falas, për vitin 2024 lidhen 177 kontrata
Drejtoria e Ndihmës Juridike Falas, në zbatim të ligjit “Për ndihmën juridike të garantuar nga shteti”, bëri të ditur të hënën se ka lidhur më 1 mars 2024 kontratat e përvitshme të shërbimit me avokatët e përfshirë në listën e miratuar nga Dhoma e Avokatisë së Shqipërisë, për ofrimin e ndihmës juridike dytësore.
Kontratat e lidhura janë vijim procedure pas shortit të hedhur në muajin janar, nga ku u përzgjodhën avokatët që do të ofrojnë ndihmë juridike dytësore në proceset civile dhe administrative për vitin 2024.
Për vitin 2024 janë lidhur 177 kontrata, nga 159 që u lidhën në 2023-shin.
Ligji “Për ndihmën juridike të garantuar nga shteti” ka si qëllim ofrimin e ndihmës juridike falas për të siguruar akses të barabartë të të gjithë individëve në sistemin e drejtësisë; të sigurojë mirë organizimin, miradministrimin dhe mirëfunksionimin e institucioneve shtetërore përgjegjëse për administrimin e ndihmës juridike; të sigurojë ofrimin e shërbimeve të ndihmës juridike në mënyrë profesionale, cilësore dhe efektive.
