Ndihmojnë Iranin, SHBA vendos sanksione ndaj Rusisë, Kinës dhe Turqisë

Administrata amerikane ka vendosur sanksione të reja që synojnë individë dhe subjekte në Iran, Rusi, Kinë dhe Turqi të lidhur me zhvillimin e dronëve dhe avionëve ushtarakë iranianë. 

Sanksionet synojnë 7 individë dhe 4 entitete në katër vendet për të cilat Uashingtoni thotë se “lehtësuan dërgesat dhe transaksionet financiare” për industrinë e prodhimit të avionëve të Iranit dhe përpjekjet e saj për të ndërtuar dronë (UAV) dhe avionë ushtarakë, njoftoi Departamenti i Thesarit i SHBA.

“Përhapja e vazhdueshme dhe e qëllimshme e dronëve iranianë i mundëson Rusisë, përfaqësuesve të saj në Lindjen e Mesme dhe agjentëve të tjerë destabilizues të minojnë stabilitetin global,” tha nënsekretari i Thesarit i SHBA për Terrorizmin dhe Inteligjencën Financiare, Brian Nelson.

Uashingtoni kishte sanksionuar më parë pesë kompani me bazë në Kinë dhe një individ për shitjen dhe transportimin pjesëve të përdorura për dronët.

Zyrtarët amerikanë kanë thënë se priten më shumë sanksione kundër Republikës Islamike, edhe pse të dy vendet ranë dakord për një shkëmbim të të burgosurve këtë javë.