Ndryshimet në kabinetin qeveritar, Bardhi kërkesë në Kuvend: Duam 6 orë debat!
Kryetari i Grupit Parlamentar të PD-së, Gazment Bardhi nëpërmjet një shkrese drejtuar Kuvendit të Shqipërisë ka kërkuar që ndryshimet në përbërjen e Këshillit të Ministrave të bëhen përmes një debati parlamentar.
Në kërkesën e tij, Bardhi shkruan se “Përbërja e Këshillit të Ministrave nuk është një produkt privat i Kryeministrit, që gëzon vetëm të drejtën kushtetuese të propozimit të saj, por caktimi është një ndërveprim institucional mes tre institucioneve Kryeministër-President i Republikës-Kuvendi i Shqipërisë.
Sipas të njëjtës shkresë, thuhet se, Kuvendi i Shqipërisë nuk mund të ketë rol formal, vetëm në certifikimin e vullnetit personal të Kryeministrit, por duhet të diskutojë dhe vlerësojë në meritë propozimet dhe dekretet e ardhura.”.
Grupi Parlamentar i PD kërkon që debati të zhvillohet në një kohë prej 6 orësh.
“Duke qenë se jemi përpara ndryshimit të përbërjes së Këshillit të Ministrave, që nënkupton një përbërje të re të tij, në përputhje me nenet 12, 46, 48 dhe 110 të Rregullores së Kuvendit, kërkojmë që shqyrtimi i Dekreteve të Presidentit që ndryshojnë përbërjen e Këshillit të Ministrave t’i nënshtrohen debatit parlamentar, prej 6 orësh, të ndarë në mënyrë proporcionale mes grupeve parlamentare.”, -shkruhet në kërkesën zyrtare të Grupit Parlamentar të PD.
