Ndryshimet në Urdhrin e Mjekëve, nga gjobat 10 mln lekë te heqja e licensës së profesionit
Ndryshimet e ndodhura me aktin normativ të qeverisë të disa ditëve më parë parashikojnë masa të ashpra në Urdhrin e ri të Mjekëve të cilat nisin që nga vërejtjet, pezullimi i shërbimeve mjekësore, gjoba që shkojnë deri në 1 milionë lekë të reja deri tek heqja e licensës për ushtrimin e profesionit të mjekut.
Këto masa kanë si qëllim rregullimin e ushtrimit të duhur të profesionit të mjekëve të cilët synojnë të punojnë njëkohësisht në spitalet publike dhe në ato jo publike por pa cenuar aktivitetin e tyre profesional.
Në këtë mënyrë, me masat e reja parashikohet që mjeku të “të mos punojë në sistemin shëndetësor jopublik më shumë se 30 për qind të orëve mujore, që punon në sistemin shëndetësor publik”.
Një nga pikat për të cilat u kërkohet në mënyrë të qartë mjekëve në spitalet publike është që këta të fundit të mos t’i drejtojnë pacientët e tyre në spitalet private. Gjithashtu, që një mjek të ushtrojë profesionin e tij në një spital privat duhet më parë t’i marrë leje drejtorit të spitalit publik ku punon.
“Një anëtar i Urdhrit të Mjekëve, që kërkon të ushtrojë profesionin e mjekut në një institucion shëndetësor jopublik, duhet t’i bëjë kërkesë titullarit të institucionit shëndetësor publik, ku ai është i punësuar.
Në kuptim të këtij ligji, termi “ushtrim i profesionit të mjekut” përfshin hapjen, pjesëmarrjen, si edhe punësimin në një institucion shëndetësor jopublik”, thuhet në ndryshimet e kryera në Urdhrin e Mjekut të botuar në Fletoren Zyrtare.
Në ndryshimet e reja parashikohet se mjekët që ushtrojnë profesionin e tyre në spitalet publike që kanë përfituar statusin e autonomisë nuk mund të punojnë në spitalet private.
“Anëtarët e Urdhrit të Mjekëve, të cilët janë punësuar në një institucion shëndetësor publik, që ka përfituar statusin e autonomisë spitalore financiare…”, theksohet më tej në ndryshimet mbi urdhrin e ri të mjekëve.
Në ushtrimin e profesionit të mjekut në spitalet publike parashikohen edhe masat disiplinore në rastet kur vërtetohet se anëtari i Urdhrit të Mjekut ka kryer shkelje të etikës, të Kodit të Etikës dhe Deontologjisë Mjekësore ose ka bërë gabime teknike.
Ato nisin që me vërejte, pezullim për të realizuar shërbime të caktuara mjekësore, për një periudhë nga 6 muaj deri në 3 vjet, pezullim të licensës së ushtrimit të profesionit të mjekut në tërësinë e saj, për një periudhë nga 6 muaj deri në 5 vjet, gjobë me vlerë nga 100 mijë lekë deri në 1 milion lekë deri në heqjen e licensës për ushtrimin e profesionit të mjekut.
Referuar ndryshimeve të reja në urdhrin e mjekut, procedimi disiplinor fillon brenda 5 vjetëve nga momenti i kryerjes së shkeljes dhe në rastin “kur mjeku ushtron detyrën në të njëjtin institucion shëndetësor, ku ka kryer shkeljen disiplinore, procedimi disiplinor fillon menjëherë nga momenti i konstatimit të saj”.
Përveç masa disiplinore Urdhrit të Mjekëve i është kërkuar që të hartojë edhe Kodin e ri të Etikës dhe Deontologjisë Mjekësore, brenda 6 muajve nga hyrja në fuqi e këtij akti normativ. Ndërsa mjekëve u është kërkuar që të rregullojnë statusin e profesionit të tyre0 brenda dy muajve nga miratimi i udhëzimit të ministrit përgjegjës për Shëndetësinë.
